Напярэдадні IX Міжнароднага з'езду рэдэмптарысцкай моладзі, у нядзелю 8 жніўня 2010 г., дзве сястры рэдэмптарысткі Кліменція Банга і Міхаіла Лізак склалі вечныя зарокі. Боская Літургія, у часе якой сёстры паабяцалі пажыццёвыя убоства, чысціню і паслухмянасць, а таксама служэнне найбольш бедным і апушчаным у духу св. Альфонса Лігуоры, адбылася ў храме святамучаніка Язафата ў суправаджэнні спеву моладзевага хору «У руках Марыі» з г. Івана-Франкоўска.
Узначаліў Літургію протаігумен Львоўскай правінцыі аа. рэдэмптарыстаў а. Васіль Іваніў. Зарокі сясцёр прыняла генеральная настаяцелька Кангрэгацыі сясцёр місіянерак Найсвяцейшага Адкупіцеля с. Энеліз Герцыг.
Пасля Службы ў манастыры св. Альфонса адбылося святкаванне, на якім прысутнічалі, акрамя сясцёр, айцоў, братоў і родных, таксама маладыя людзі з многіх краін свету, якія прыехалі ва Ўкраіну ў якасці валанцёраў Міжнароднага з'езду рэдэмптарысцкай моладзі.
Вечныя зарокі сясцёр Кліменціі і Міхаілы - не толькі вялікае сведчанне і свята для рэдэмптарысцкай супольнасці ва Ўкраіне, але і за яе межамі. Больш за тое, яны сталі добрай нагодай для прысутнай моладзі ўбачыць чарговы прыклад поўнага пасвячэння Богу.