"Святыя - як зоркі: мы іх бачым, сузіраем іх прыгажосць, любуемся ёю, але ніколі не можам іх дасягнуць... Святыя выдатныя, але недасяжныя" - з такімі словамі звярнуўся а. Яцэк Дэмбэк, генеральны кансультар ЧНА да ўдзельнікаў пілігрымкі з нагоды 120-х угодкаў кананізацыі св. Кляменція Гофбауэра. Аднак мэтай яго пастырскага слова было пераканаць у непраўдзівасці дадзенага сцвярджэння, бо ў рэчаіснасці святым можа стаць кожны. Яркім прыкладам гэтага з'яўляецца святы Кляменцій - звычайны хлопец з в. Цісавыцэ (Чэхія), які жадаў ісці за Хрыстом і выконваць Яго волю.
Над жыццём гэтага праведніка мы мелі магчымасць разважаць на працягу тыдня з 18 да 23 траўня 2009 г. На гэтую тыднёвую пілігрымку сабраліся нямала асоб, у прыватнасці, рэдэмптарысты і парафіяне з Нямеччыны, Аўстрыі, Канады, ЗША, Новай Зеландыі, Вялікабрытаніі, Славакіі, Польшчы і Ўкраіны. У складзе ўкраінскай групы былі а. Васіль Іваніў, а. Яраслаў Фядуніў, а. Міхайла Іваняк, а. Раман Лагіш, а. Віталь Назар, а. Раман Жыравецкі, моладзь і парафіяне храмаў св. Язафата і Беззаганнага Зачацця Найсвяцейшай Багардзіцы ў Львове.
Святкаванне пачалося ў сталіцы Аўстрыі - Вене - агульнай малітвай, якую ўзначаліў а. Лорэнц Войт, пратаігумен Аўстрыйскай Правінцыі. Пасля адбыўся паказ сцэнкі пра жыццё св. Кляменція, якую выдатна паставілі парафіяне храма рэдэмптарыстаў у Вене. У аўторак праводзіліся экскурсійныя туры, на якіх была ўнікальная магчымасць азнаёміцца з непараўнальнай архітэктурай і багаццем гэтага горада. Літургію ўзначальваў вялебны а. Ёсіф Тобін, Архімандрыт ЧНА. У сераду адбылася невялікая канферэнцыя, прысвечаная жыццю св. Кляменція і агляду манаскага жыцця ў Аўстрыі. Пасля абеду адбылася працэсія вуліцамі горада з удзелам духавенства, парафіян, духавага аркестра і пекараў, якія прыбылі з Польшчы (св. Кліменцій з'яўляецца іх заступнікам, паколькі сам працаваў у гэтай галіне).
У чацвер мы падарожнічалі да маляўнічага чэшскага мястэчка Цісавіцэ, дзе нарадзіўся св. Кляменцій. Там была адпраўлена ўрачыстая Св. Літургія. Пасля таго пілігрымка пралягала ў Кракаў, дзе паломнікі мелі магчымасць убачыць цікавыя месцы горада і прыняць удзел у Св. Літургіі. На завяршэнне адбыўся выступ хору ў суправаджэнні камернага аркестра.
Гэтая тыднёвая пілігрымка пакінула шмат прыемных успамінаў і напоўніла сэрцы яе ўдзельнікаў надзеяй, супакоем і радасцю.
